Ich hat e schwere Kindheit, mai Mottr konn iwehaupt net koche. Ja sowas kits a, richtig, a noch in Nadasch. Awe ich pin toch kewachse, awe nur wal mai Großmottr und escht recht ti Dédi haat kut koche konn. Nach hon ich mal mai Mottr kfrecht: „Kenne viele Maalich net khoche?“ „Ich waaß net, ich maan ta sain noch e paa, net nur ich pin so tapisch. Such tie ane aus ti koche konn, awe lern tu selwr koche!“, hat se ksacht. Nach hon ich ketenkt: Tes konn toch net so schwe sain. Ta prauch me nur en Topf, e Kochleffl, un nach schmeißt me alles nai in ten Topf, was me in tere Speis finne konn. Ich maan so mächts mai Mottr a. Wann’s nach ofengt zu prenne, un ti Kuchl dampft, nach sechtse: „Kinnr, ich maan tes is fetich!“ Ich hon ketenkt, ich waat jetzt net solang, pis ich ane fin, ti kut koche konn, we waaß, wu ti all trham sain, vielleicht nur iwe ten kroße Perich, we waaß wann ich tot hikumm, tes taut vielleicht zu lang, trum len ich liewr koche.

Ich hon en Topf ksucht, en richtich kroßn, wu a was naipasst, tes welle sichr all khost, wanns fetich is, ich konn a tene Nach peschleit was prenge, un mai Lehrerin in tere Schul, ti hon ich haat ken. Ich hon ten Topf uf ten Tisch kstellt, un in ten Hűtő kschaut. Liwe Lait, tes staunt mich iwehaupt net, tass mai Mottr nix konn koche, tes is ja lee. Ich hon mich umkschaut, nach hon ich halt kenumme was ta waa. Nuul, Peckmes, Umorge, und Pohne. Ich hon ti Pohne escht nai, tes kracht so schee wame riet. Nach ti Nuul 52 trzu, oh-oh-oh, tes is ja krat wi Musich in Afrika! Na awe jetzt mai Rezept: e 2 litrich Klas voll Kwetscheprai trzu, un e finflitr Umorgeklas, mit Prii, sunst pickt tes Zeich ja on mai Kochleffl. Nach hon ich okfangt tes rien. Huuu tes is richtig schwere Arwet, ta staunts mich iwehaupt net mehr, tass tes ti Maalich net ken hon. Kut tass ich jetz waaß, tass ich e Maistr pin, ta konn ich sichr haat viele Maalich ailade. Ich hon geriet wie wiidich, e halwe Stunt, mit Mii un Not hon ich ten Kochleffl nochmal rauskricht aus ten Matsch. Awe kut hat tes net krat auskschaut. Jetzt waaß ichs … ich hon ten Topf noch netemal uf ten Ofe kstellt. Schnell hon ich Fair kemacht, und nach hats okfangt tes koche. Nach zwa Minute hon ich mich umkschaut… is te Hund raikumme? Stinge mai Fiß? Naaaa, tes kimmt aus ten Topf. Tes is ogeprennt, krat so wie pa mai Mottr, ich pin krat so tapet. Kroßr Kott, was mach ich jetz nuar? Ich hon ten stingede Topf samt ten Prai uf ten Misthauwe vom tritt Nachpeschlait kschmisse, nemal ti Hunde hon sich hiigetraut, und ich pin schnell trvoksprunge. Ich maan ich muss mir toch ane such, ti koche konn, ta hat te liwe Kott net nuar pa mai Mottr kspart, wu e ti kude Kochleffl vetalt hat.