Es hot emol weit-weit wek e Lant keewe, wu ka Leit net kelept houn. Owr, wesst er, selpst tuot, wu ‘s ka Leit net kit, selpst tuot muß es e Kenichin un en Kenich keep: ti Welt is halt emol sou eigericht, me kounn tekeche nix kemach.
In sellen Lant hot ‘s owr wenestinks nie net en Kriek keewe, wal tie Efindunk khjet te Leit, wal selli houn e Natuor, taß se sich net kenne keleit un a af enant neidich sen, noch kehn se halt als af enant lous. Ti Kenichin voun ten Lant in Friede hot Wissoka khaaße, un woar en krouße Aichlpaam in en Tol, te wos owr sou mächtich woar, taß e iwe tene Perich aa nuch hot kennt kschaa.

Kenich Daleko is en Fluß kewest, te nuor e aanzich Quelle khoot hat, owr e hot sou vil Wasser ketroche, wos pis in ten Meer nei keloufe is, taß mr zwanzich Meile weidr trenn aa nuch hot kennt tevou ketrenk, wal ‘s net salzich woar.
Wissoka un Daleko sen midenant klecklich kewest, noch aa, wenn se enant kanz in de Näh net houn kennt kekoumm. Aamol, pa en krouße Stuorm hat Wissoka wouhl scho ketenkt, taß se ti Eede louslässt, taß se kounn in ten Fluß kstjetz, owr Daleko hot ere sou lang aus sein ewiche Laaf zugeredt, pis se net is weidr tuot stehnkepliewe, wu se kewochse is. Nuo kflennt houn se alli zwa: te Wint hot ti Stimm voun Kenichin Wissoka tevougetroche, un Kenich Daleko hot Welle kschloche, taß es pis in ten Meer nei kfaamt hot.

Noch is emol a kepassiert, taß es in e Joahr seit en Mounet scho kerechet hot, noch hot Daleko sou vil Wasser ketroche, taß er oukfankt hot, san Ufer wekzuschwemme. To hot noch Wissoka ti kanz Zeit kerufe un ihre Wuotzl kstreckt, taß se sich kenne erraich, nuo te Kenich hot kewesst, taß sei Fraa ti Eede zum Lewe prauch, noch hot er in sein Laaf liewr Staa opksetzt, nuo taß er Wissoka nix Schlimmes outut.

Noch sen vile Joahr vekange. Net sou wi pa tene Leit, taß tie vleicht hunet Joahr alt wern, wal Päm un en Fluß leewe längr. Es woan vleicht fenfhunet Soummr iwe ten Kenichspoar triwehiegezouche, si woarn enant in den Näh, wos ene oarich wichtich woar, Daleko hot Prounne eenich te Eede ketriewe, ti wos pis zu Wissoka keraaicht houn, un Wissoka hot voun ten Wasser kelept.

Wi ti Zeit vekange is, hot Wissoka owr kemerkt, taß iwe de Prounne immer wenicher Wasser zu ihrne Wuotzl tuorichkemmt, wal ti Quelle voun Daleko is schwächer wuon. Si hot nix ksocht, nuor hot se voun Joahr zu Joahr immer wenicher neie Nästr un Plädr ketriewe. Daleko is tes innewuon, wal er tes in sein Wasserspiechl ksjehn hot, wos mit sei Fraa lous is, kewesst hot er owr selwer aa, wos passiert, owr wenn ti Quelle ka Wasser meh hot, tekeche kounn te krest Fluß nix kemach.

Daleko hot zum Schluß ka Wasser meh pis in ten Meer keprocht, nuor hot er ti letzte Troppe in e Quelle zu Wissoka kfiehrt. E Noust, tes wos iwe ten Fluß khounge hot, woar e Zeit lang nuch krie, noch is es Wasser owr af aamol kanz auskepliewe, un es letzt Eichlplät is kanz haamlich in ten trockede Flußlaaf nopkfalle.